Reina náði varla andanum þegar smiteinkennin voru verst

Spænski markvörðurinn Pepe Reina óttaðist um líf sitt þegar hann fann fyrir verstu einkennunum af COVID-19 sýkingu sinni.

Reina, sem er 37 ára gamall, er í dag leikmaður Aston Villa í ensku úrvalsdeildinni þar sem hann hefur verið að láni frá AC Milan síðan í janúar. Þessi fyrrverandi Evrópumeistari með Liverpool hefur verið í einangrun frá því að hann fór fyrst að finna fyrir einkennum smits:

„Ég var með hita, hósta og hausverk sem ég losnaði ekki við,“ sagði Reina við Corriere dello Sport á Spáni. Hann hefur nú jafnað sig af veikindunum en leist ekki á blikuna um tíma:

„Ég var þreyttur og ég var hræddur þegar ég náði varla andanum í 25 mínútur. Það var eins og að hálsinn minn væri lokaður og að loft kæmist ekki í gegn. Ég var lokaður inni í herbergi fyrstu sjö eða átta dagana,“ sagði Reina.