Innlent

Barði í bíla og fór ekki að fyrir­mælum lög­reglu

Atli Ísleifsson skrifar
Í dagbók lögreglu segir frá því að um klukkan 22:30 hafi verið tilkynnt um þjófnað á tölvu frá veitingahúsi við Laugaveg. Myndin tengist fréttinni ekki beint.
Í dagbók lögreglu segir frá því að um klukkan 22:30 hafi verið tilkynnt um þjófnað á tölvu frá veitingahúsi við Laugaveg. Myndin tengist fréttinni ekki beint. Vísir/Kolbeinn Tumi

Lögregla á höfuðborgarsvæðinu handtók í nótt konu í annarlegu ástandi við veitingahús í miðborg Reykjavíkur eftir að hún hafði barið í bíla og ekki farið að fyrirmælum lögreglu. 

Í dagbók lögreglu segir að tilkynningin hafi borist klukkan rúmlega fjögur og var konan vistuð í fangageymslu vegna ástands síns.

Um klukkan 22 hafði lögregla afskipti af pari sem hafði farið frá ógreiddum reikningi á veitingahúsi í hverfi 108 í Reykjavík. Hafði parið fengið mat og áfengi og síðan látið sig hverfa eftir að hafa farið út að reykja. Þegar þau fóru frá staðnum elti starfsfólk parið þar til lögregla kom.

Í dagbók lögreglu segir einnig frá því að um klukkan 22:30 hafi verið tilkynnt um þjófnað á tölvu frá veitingahúsi við Laugaveg. Náðust myndir af geranda og var hann handtekinn síðar er lögreglumenn höfðu af honum afskipti. Maðurinn var vistaður fyrir rannsókn máls í fangageymslu lögreglu.

Þá segir frá því að tilkynnt hafi verið um innbrot í hverfi 105. Hafði einhver farið inn og stolið verðmætum meðan húsráðendur voru ekki heima.

Ölvun við akstur

Skömmu fyrir klukkan eitt í nótt var tilkynnt um umferðaróhapp í hverfi 108. Var þar ekið á bíl og hafi ökumaðurinn farið frá vettvangi. Hann var handtekinn skömmu síðar og er hann grunaður um ölvun við akstur. Ökumaðurinn var vistaður í fangageymslu lögreglu vegna rannsóknar málsins.

Loks segir að lögregla hafi þurft að hafa afskipti af nokkrum ökumönnum vegna aksturs undir áhrifum áfengis og/eða fíkniefna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.