Fótbolti

Finnar hætta með kynja­for­skeytið í nafni efstu deildar kvenna

Atli Ísleifsson skrifar
Finnskar landsliðskonur fá nú jafnmikið borgað frá finnska knattspyrnusambandinu og karlar.
Finnskar landsliðskonur fá nú jafnmikið borgað frá finnska knattspyrnusambandinu og karlar. EPA

Frá og með komandi tímabili mun nafn efstu deildar kvenna í fótbolta í Finnlandi vera Kansallinen Liiga (í. Þjóðardeildin). Með nafnabreytingunni er kynjaforskeytinu í nafni deildarinnar kastað og er breytingin sögð liður í langtímaáætlun finnska knattspyrnusambandsins þar sem lögð er áhersla á jafnrétti.

Frá árinu 2007 hefur nafn efstu deildar kvenna verið Kvennadeildin, en það nafn mun nú heyra sögunni til. Fulltrúar finnska knattspyrnusambandsins segja að nú verði hætt að vera með forskeyti í nafninu sem vísi í kyn.

„HM síðasta sumar vakti mikla alþjóðlega athygli og sýndi fram á að fólk horfi á fótbolta burtséð frá kyni. Fólk horfir á leiki þar sem þeir hafa skemmtanagildi og leikmennirnir toppíþróttafólk,“ segir Ari Lahti, formaður sambandsins í yfirlýsingu. „Því eigi kvennafótboltinn að lúta sömu skilyrðum og karlafótboltinn.“

Breytingin er liður í jafnréttisátaki finnska knattspyrnusambandsins, en í haust var greint frá því að laun landsliðsmanna skyldu vera þau sömu, burtséð frá kyni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.