Talið er að eldurinn við Laugaveg 73 í morgun hafi komið upp þegar kveikt var í rusli í húsgrunninum. Heimilislausir hafa haldið til á lóðinni, samkvæmt upplýsingum frá slökkviliðinu á höfuðborgarsvæðinu.

Mikill viðbúnaður var vegna eldsins um klukkan níu í morgun en hann reyndist þó minni en óttast var í fyrstu. Vinnu var lokið á vettvangi fljótlega eftir að útkallið barst.

Varðstjóri hjá slökkviliðinu á höfuðborgarsvæðinu segir í samtali við Vísi að ekkert rafmagn hafi verið í húsgrunninum. Þá sé um að ræða hús sem verið er að rífa og ekkert tjón hafi orðið á því. Enginn var inni í byggingunni þegar slökkvilið kom á vettvang og aldrei nein hætta á ferð.