Innlent

Hvass­viðri eða stormur austast síð­degis

Atli Ísleifsson skrifar
Reikna má með 15 til 23 metrum á sekúndu þar sem hvassast verður suðaustantil.
Reikna má með 15 til 23 metrum á sekúndu þar sem hvassast verður suðaustantil. vísir/vilhelm

Veðurstofan spáir vaxandi norðvestanátt og snjókomu með köflum á austanverðu landinu í dag, þar sem búast má við hvassviðri eða stormi. Reikna má með 15 til 23 metrum á sekúndu þar sem hvassast verður suðaustantil.

Hægara verður vestantil, með dálitlum éljum. Vægt frost verður inn til landsins en víða frostlaust við ströndina.

Gular viðvaranir

Gular veðurviðvaranir taka gildi síðdegis á Austurlandi að Glettingi, á Austfjörðum og á Suðausturlandi í dag þar sem spáð er norðvestanstormi eða hvassviðri. Á Austurlandi að Glettingi er einnig gert ráð fyrir snjókomu og þar má búast við lélegu skyggni og versnandi akstursskilyrðum.

Flestir helstu vegir eru færir og var Flateyrarvegur mokaður í gær. Honum var þó lokað klukkan tíu í gærkvöldi af öryggisástæðum en gera má ráð fyrir að hann opni aftur nú í morgunsárið.

Ísing á vegum

Vegfarandi á leið um Borgarfjörðinn í grennd við Hreðavatnsskála hafði síðan samband við fréttastofu og varaði við gríðarlegri hálku á veginum auk þess sem gangi á með koldimmum snjóéljum. Mikil ísing virðist vera undir snjónum sem hrannast upp á veginum og því afar varhugavert fyrir fólk á vanbúnum bílum að fara þar um.

Á aðfararnótt sunnudags er síðan gert ráð fyrir gulri viðvörun um allt land þar sem spáð er sunnan stormi eða roki norðan- og austanlands. Þar hlýnar ört en verður úrkomulítið. Sunnan- og vestanlands er hins vegar gert ráð fyrir sunnan hvassviðri eða stormi með mikilli rigningu og ört hækkandi hitastigi.

Búast má við miklum leysingum, auknu afrennsli og vatnavöxtum í ám og lækjum. Mikil hálka getur myndast þar sem rignir á klakabunka eða þjappaðan snjó.

Veðurhorfur á landinu næstu daga

Á laugardag: Vestan 10-15 á A-landi í fyrstu, annars hægari vindur. Bjart með köflum, en stöku él S-lands og við N-ströndina. Frost 0 til 8 stig. Snýst í vaxandi sunnanátt um kvöldið.

Á sunnudag: Sunnan 15-25 m/s og rigning um morguninn, talsverð úrkoma S- og V-lands. Hvöss suvestanátt með skúrum eða slydduéljum síðdegis, en þurrt á A-landi. Hiti 2 til 10 stig.

Á mánudag: Hvöss suðvestanátt og él, en bjartviðri A-lands. Hiti um eða undir frostmarki.

Á þriðjudag: Suðvestanátt og dálítil él, en þurrt A-til á landinu. Hiti um frostmark, en frostlaust við S- og V-ströndina.

Á miðvikudag: Suðvestanátt og rigning, en úrkomulítið NA-lands. Milt veður.

Á fimmtudag: Útlit fyrir suðvestanátt með éljum og kólnandi veðri.

 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.