Innlent

Varað við skriðum á stóru svæði á Norðausturlandi

Tryggvi Páll Tryggvason skrifar
Rauða svæðið táknar það svæði þar sem hætta er á jarðskriðum í kjölfar stórs skjálfta.
Rauða svæðið táknar það svæði þar sem hætta er á jarðskriðum í kjölfar stórs skjálfta. Mynd/Almannavarnadeild ríkislögreglustjóra.

Almannavarnadeild Ríkislögreglustjóra minnir á að óvissustig vegna jarðskjálfrahrinunnar á Norðausturlandi er enn í gildi. Rannsóknir bendi til að enn sé innistæða fyrir stórum skjálfta á svæðinu og er varað við skriðuföllum á norðanverðan Tröllaskaga og Flateyjarskaga en einnig á Melrakkasléttu.

Þetta kemur fram í færslu á Facebook-síðu Almannavarnadeildar þar sem myndin sem sjá má hér að ofan er birt en rauða svæðið táknar það svæði þar sem hætta er á áhrifum vegna skriðufalla eða flóðbylgna í kjölfar stórs jarðskjálfta.

Jarðskjálftahrina sem hófst fyrir norðan land þann 19. júní stendur enn yfir og hafa tæplega níu þúsund skjálftar mælst í henni en þetta er öflugasta hrinan á Tjörnesbrotabeltinu í ríflega 40 ár.

STUTT: Óvissustig Almannavarna á Norðausturlandi vegna jarðskjálftahrinunnar sem hófst 19. júni er enn í gildi. Á meðan...

Posted by Almannavarnadeild ríkislögreglustjóra on Miðvikudagur, 1. júlí 2020

Virknin hefur færst aðeins austar eftir Húsavíkur-Flateyjar misgenginu þó jarðskjálftar þar séu flestir mjög litlir og finnist ekki í byggð en ekki er hægt að útiloka að þarna geti komið stærri skjálftar. Rannsóknir á misgenginu benda til að enn sé innistæða fyrir stærri skjálfta allt að stærð 7 á Húsavíkur-Flateyjar misgenginu og meðan að hrinan er í gangi eru auknar líkur á að stærri skjálftar mælist, að því er fram kemur í stöðufærslu Almannavarna.

„Ef að kæmi til slíks skjálfta er hugsanlegt að hann valdi grjóthruni og skriðum auk þess sem þekkt er að sumir stærri skjálftar valdi flóðbylgjum. Hættan á skriðuföllum er því ekki einungis bundin við norðanverðan Tröllaskaga og Flateyjarskaga eins og áður hefur verið greint frá heldur einnig austur á Melrakkasléttu.“

Mikilvægt er að fólk á svæðinu kynni sér leiðbeiningar Almannavarna um viðbrögð í jarðskjálftum og tryggi innanstokksmuni eins og hægt er hið fyrsta segir í færslu Almannavarna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.