Sverrir skoraði í toppslag

Sverrir Ingi Ingason skoraði mark PAOK sem gerði jafntefli við Olympiacos í toppslag í grísku úrvalsdeildinni í fótbolta.

Íslenski landsliðsmaðurinn kom PAOK yfir á 29. mínútu leiksins með marki upp úr aukaspyrnu, markmaðurinn hafði varið spyrnuna en náði ekki að halda boltanum og Sverrir setti frákastið í netið.

Mathieu Valbuena jafnaði leikinn fyrir Olympiacos á 64. mínútu með marki úr vítaspyrnu. Hann þurfti svo að fara út af vegna meiðsla tveimur mínútum seinna.

Leiknum lauk með 1-1 jafntefli og eru liðin því enn jöfn að stigum á toppi deildarinnar.