Tvö farþegaflug eru áætluð frá Íslandi til Bandaríkjanna. Um er að ræða flug Icelandair til Boston 8. apríl annars vegar og 15. apríl hins vegar. Sendiráð Bandaríkjanna á Íslandi hvetur bandaríska ríkisborgara sem staddir eru á Íslandi og vilja komast vestur um haf til þess að tryggja sér miða.

Þetta kemur fram í tilkynningu sendiráðsins. Þar segir að Bandaríkjamenn á Íslandi ættu að tryggja sér miða séu þeir ekki tilbúnir til þess að festast hér á landi í óskilgreindan tíma.

Fram kemur í tilkynningunni að eftir 15. apríl muni Icelandair endurskoða flugáætlun sína og mögulegt sé að eingöngu fraktflug standi eftir. Bandaríkjastjórn sér ekki fram á að skipuleggja flugferðir fyrir ríkisborgara sína frá Íslandi eftir þennan tíma.