Óljóst hvort samningar náist fyrir gefinn frest

Talið er hugsanlegt að ekki takist að klára samningaviðræður um kjarnorkuáætlun Írans áður en frestur til þess rennur út 30. júní. Abbas Araghchi, einn samningamanna Írana, segir í samtali við þarlenda fjölmiðla að líklegt sé að viðræðurnar muni ílengjast. Gefinn frestur sé ekki bindandi.

Deiluaðilar, stórveldin sex og Íran, settust að samningaborðinu í Vín í gær. Þeim hefur áður verið gefinn frestur til samninga, en það var hinn 31. mars, þá eftir átján mánaða samningalotu. Rammasamkomulag náðist loks í apríl en það felur í sér að Íranar dragi verulega úr kjarnorkuáætlun sinni og takmarki auðgun úrans og annarra geislavirkra efna, sem mögulega væri hægt að nota í kjarnorkuvopn. Í staðinn verði dregið verulega úr alþjóðlegum viðskiptaþvingunum og bönnum gegn Íran, sem leikið hafa efnahag landsins grátt árum saman.