Evrópusinnaðir flokkar með meirihluta samkvæmt útgönguspám

Flokkar sem hallir eru undir nánara samstarf við Evrópusambandið og Vesturlönd almennt virðast hafa borið sigur úr býtum í úkraínsku þingkosningunum sem fram fóru í dag.

Útgönguspár benda til að flokkur Petró Pórósjenkó Úkraínuforseta verði stærsti flokkurinn á þingi en flokkur forsætisráðherrans Arseny Jatsenjúk fylgir fast á hæla hans.

Í frétt BBC kemur fram að Pórósjenkó hafi boðað skyndilega til kosninganna, að sögn til að koma landinu á nýja braut eftir að hafa bolað burtu valdamönnum sem voru hliðhollir Rússlandsstjórn.

Um þrjá milljónir manna í Dónetsk og Lúhansk-héraði í austurhluta landsins tóku ekki þátt í kosningunum. Aðskilnaðarsinnar í austurhluta landsins undirbúa nú sínar eigin kosningar í næsta mánuði.

Um 1,8 milljónir manna á Krím-skaga tóku heldur ekki þátt í kosningunum en Rússar innlimuðu skagann í mars síðastliðinn.