Enn er diplómötum rænt

Tveimur alsírskum sendiráðstarfsmönnum í Írak var rænt í Bagdad í gær. Í það minnsta 15 manns létust í árásum gærdagsins. Alsírsku diplómatarnir voru á leiðinni úr sendiherrabústaðnum í sendiráðið í gærmorgun þegar byssumenn stöðvuðu bíl þeirra. Tvímenningarnir voru dregnir ásamt bílstjóranum út úr bifreið sinni og síðan var ekið á brott með þá. Fyrir tveimur vikum var þremur sendiráðsstarfsmönnum rænt í Bagdad, meðal annars sendiherra Egyptalands. Hann fannst myrtur nokkrum dögum síðar. Bersýnilega vakir fyrir mannræningjunum að hræða önnur arabaríki frá því að eiga í stjórnmálasambandi við ríkisstjórnina í Bagdad. Súnníar neita enn að halda áfram þátttöku í stjórnarskrárnefnd Íraks eftir að félagi þeirra var ráðinn af dögum í vikunni, þar sem þeir telja að öryggi sitt sé ekki lengur tryggt. Ákvörðun súnníanna setur samningu stjórnarskrárinnar í uppnám en henni á að ljúka 15. ágúst næstkomandi. Afar mikilvægt er að súnníar beri ekki skarðan hlut frá borði í plagginu þar sem þeir eru þegar mjög óánægðir með sinn hag.