Pakistanar stöðvi öfgamenn

Pervez Musharraf, hershöfðingi og forseti Pakistans, skoraði á landa sína í gær að setja trúarofstopamönnum í landinu stólinn fyrir dyrnar. Ennfremur sögðu talsmenn Pakistanstjórnar í gær að leit stæði yfir að aðstoðarmanni herskás múslimaklerks sem bjó í Bretlandi, í tengslum við rannsókn sprengjutilræðanna í Lundúnum þann 7. júlí síðastliðinn. Í sjónvarpsávarpi til þjóðarinnar viðurkenndi Musharraf að herskáir trúarofstopamenn yllu landinu vandræðum. Áhyggjur hafa vaxið víða um heim af því að í íslömskum skólum í Pakistan sé alið á öfgamennsku og að þessir skólar verkuðu þannig sem uppeldisstöðvar manna sem væru reiðubúnir að leggja hryðjuverkum lið í nafni "heilags stríðs". En Musharraf sagði óréttlátt að bera pakistönskum stjórnvöldum á brýn að þau stæðu sig ekki í baráttunni gegn hryðjuverkum bara vegna þess að svo vildi til að þeir sem taldir eru hafa framið tilræðin í Lundúnum voru af pakistönskum uppruna og heimsóttu Pakistan á síðasta ári.