Skorað á Þjóðverja að hætta að gelda kynferðisafbrotamenn

Helstu mannréttindasamtök Evrópu, Council of Europe, hafa skorað á þýsk stjórnvöld að hætta því að gelda kynferðisafbrotamenn sína með skurðaðgerð.

Í frétt um málið á BBC segir að sú deild samtakanna sem fjallar um pyndingar hafi sent þessa áskorun til þýskra stjórnvalda. Þjóðverjar eru ein af sárafáum Evrópuþjóðum sem geldir kynferðisafbrotamenn sína. Þetta er þó gert með samþykki viðkomandi og fær hann verulegan afslátt af fangelsisvist sinni ef hann fellst á aðgerðina. Hingað til hafa ekki nema fimm eða sex Þjóðverjar fallist á geldingu árlega undanfarin ár.

Áskoranir Council of Europe eru ekki bindandi en hafa mikil áhrif. Samtökin segja að gelding, þótt hún sé gerð með samþykki viðkomandi er óafturkræf aðgerð og geti ekki talist nauðsynleg forsenda í meðferð þessara glæpamanna.

Rannsóknir sýna hinsvegar að aðeins 3 af hverjum hundrað kynferðisafbrotamönnum endurtaka glæpi sína eftir geldingu. Nærri helmingur hinna fremur glæpi sína að nýju eftir fangelsisvist.