Tugir flóttamanna létust

Tugir flóttamanna, flestir líklega frá Írak og Íran, létu lífið þegar bátur fórst við klettótta strönd Jólaeyju í Indlandshafi. Íbúar eyjunnar fylgdust með sjóslysinu frá klettunum. Um borð í bátnum voru að minnsta kosti 70 manns á öllum aldri og fóru þeir allir í ólgandi hafið þegar skipið brotnaði í spón.

„Þetta var alveg hræðilegt,“ sagði Simon Prince, einn íbúa eyjunnar. „Fólkið kramdist. Þarna voru lík, dáin börn. Allt var þetta ósköp ömurlegt.“

Prince kallaði strax á lögreglu og bæði hann og fleiri íbúar í nágrenninu streymdu að til að reyna að hjálpa.

Hann segir að vél bátsins hafi greinilega verið biluð og hann hafi verið að velkjast undan ströndinni í um klukkustund áður en hann skall á klettunum. „Báturinn velktist fram og til baka mjög nálægt klettunum hérna.“ Hann býr rétt hjá klettunum og vaknaði snemma morguns við hróp frá fólkinu úti fyrir ströndinni.

Einn maður komst af sjálfsdáðum í land og rúmlega 40 öðrum tókst að bjarga, en nærri 30 lík höfðu fundist. Þrír voru í lífshættu, þar af tveir karlmenn með alvarlega höfuðáverka og ein kona með áverka á kviðarholi.

Fólkið á ströndinni kastaði 50 til 60 björgunarvestum út til fólksins sem reyndi að svamla um í hafinu, en mörg vestanna flutu burt án þess að nokkrum tækist að ná í þau.

„Þetta atvik minnir okkur á þær hættur sem fólk stendur frammi fyrir sem flýr undan ofsóknum og mannréttindabrotum í heimalandi sínu, og til hve örvæntingarfullra ráða það grípur í leit sinni að öryggi,“ segir Richard Towle, fulltrúi Flóttamannahjálpar Sameinuðu þjóðanna. Báturinn var innan við tíu metra langur með skýli ofan á gerðu úr plast- eða efnisdúk.

Jólaeyja tilheyrir Ástralíu, en er nær Indónesíu en Ástralíu. Frá Djakarta, höfuðborg Indónesíu, eru 360 kílómetrar til Jólaeyju, en frá Ástralíu er fjarlægðin 2.600 kílómetrar.

Algengt er að flóttamenn frá Írak, Íran og Afganistan fljúgi til Indónesíu og haldi þaðan áfram siglandi til Ástralíu, oft fjölmargir saman á litlum bátum.

Ef þeir nást eru þeir oft sendir til Jólaeyju þar sem þeir dvelja í fangelsi meðan mál þeirra eru til umfjöllunar hjá stjórnvöldum.

gudsteinn@frettabladid.is