Ætlar að selja líf sitt á eBay

Tuttugu og níu ára kaupsýslumaður frá Tampa Bay í Flórída hefur sett líf sitt til sölu á uppboðsvefnum eBay.

Maðurinn sem heitir Shane Butcher vill fá um þrjár og hálfa milljón dollara, eða um hálfan milljarð íslenskra króna, fyrir þessa óvenjulegu vöru.

Á síðunni segir að með lífi hans fylgi mikið magn tölvuleikja, tvær íbúðir við sjávarsíðuna og þrír bílar. Þá eru öll húsgögnin hans til sölu ásamt sjálfum heimilishundinum, takk fyrir túkall.

Söluna segir hann vera sinn ameríska draum en fyrir peninga ætlar hann að ferðast um heiminn ásamt eiginkonu sinni áður en þau byrja nýtt líf.

Með auglýsingunni á vefnum fylgir myndskeið á myndabandasíðunni Youtube þar sem hann fer yfir kosti og galla heimilisins.

Yfir 50 þúsund manns hafa skoðað auglýsinguna en enginn hefur enn boðið í lífið. Fólki líst þó vel á hugmyndina og óskar honum góðs gengis.