Gera kröfu um fimm ára fangelsi handa Berlusconi

Málflutningi er lokið í spillingarmáli ákæruvaldsins á Ítalíu gegn Silvio Berlusconi fyrrum forsætisráðherra landsins.

Saksóknarar málsins gerðu kröfu um fimm ára fangelsisdóm yfir Berlusconi en hann var ákærður fyrir að hafa mútað breskum lögfræðingi til að leggja fram hagstæðan vitnisburð í sakamálum gegn sér fyrir nokkrum árum síðan.

Þótt Berlusconi verði fundinn sekur er ekki víst að hann fari í fangelsi vegna aldurs síns en ráðherrann fyrrverandi er orðinn 75 ára gamall. Samkvæmt ítölskum lögum er hægt að fella niður fangelsisdóma hjá þeim sem komnir eru yfir sjötugt.