Að mati dómsmálaráðherra var framkvæmd brottvísunar albönsku konunnar sem vísað var úr landi 36. viku meðgöngu í samræmi við markmið laga um útlendinga og gildandi verklag „Útlendingastofnunar og stoðdeildar embættis ríkislögreglustjóra og áherslur stjórnvalda um mannúðlega og skilvirka meðferð í málefnum útlendinga hér á landi.“

Þetta kemur fram í svari Áslaugar Örnu Sigurbjörnsdóttur dómsmálaráðherra við fyrirspurn Helgu Völu Helgadóttur, þingmanns Samfylkingarinnar.



Konan kom hingað til lands í október ásamt eiginmanni sínum og barni í byrjun október og var fjölskyldunni synjað um alþjóðlega vernd þann 11. október og hún flutt úr landi aðfaranótt 5. nóvember síðastliðinn. Brottvísun konunnar vakti nokkra reiði í samfélaginu eftir að samtökin No Borders Iceland og Réttur barna á flótta vöktu athygli á málinu.



Sjá einnig: Segja að kasóléttri konu hafi verið vísað fyrirvaralaust úr landi



Helga Vala spurði hver hafi tekið ákvörðun umbrottvísun konunnar en í svari dómsmálaráðherra segir að stoðdeild ríkislögreglustjóra beri ábyrgð á því að framkvæma ákvarðanir Útlendingastofnunar um flutning umsækjenda til heimalands þeirra. Helga Vala spurði jafnframt hver taki ákvarðanir um að heimila brottvísun þungaðra kvenna, þrátt fyrir að þær hafi verið metnar í læknisskoðun á Landspítala óhæfar til að fljúga vegna áhættumeðgöngu og á hvaða grundvelli læknir Útlendingastofnunar geti tekið ákvörðun um útgáfu flugvottorðs, jafnvel án þess að læknisskoðun fari fram.

Í svari ráðherra segir að í tilviki albönsku konunnar hafi stoðdeild ríkislögreglustjóra haft samband við heilsugæsluna á höfuðborgarsvæðinu, sem annist þjónustu við umsækjendur um alþjóðlega vernd, og hafi þar fengið vottorð frá lækni um að konan væri ferðafær. „Vottorðið var gefið út 4. nóvember eða degi fyrir brottför í samræmi við reglur flugfélaga um aldur slíkra vottorða. Undir kvöld þann sama dag fór konan á kvennadeild Landspítala og var útskrifuð eftir miðnætti. Við komu hennar aftur í búsetuúrræði sitt fengu starfsmenn stoðdeildar í hendur vottorð sem gefið hafði verið út á Landspítalanum skömmu áður. Þegar þeim varð ljóst að á því vottorði kæmi hvorki fram að fyrirhugaður flutningur væri óráðlegur né að flutningur viðkomandi úr landi á þessum tímapunkti myndi stefna öryggi hennar eða ófæddu barni í hættu var ákveðið að fresta flutningnum ekki,“ segir í svari ráðherra. 



Ráðherra geti þó ekki svarað því hvernig mat læknis eða heilbrigðisstarfsfólks fari fram þegar gefin eru út vottorð. Er þess þó getið að embætti landlæknis leiði nú vinnu við að yfirfara núgildandi verklag við útgáfu vottorða frá heilbrigðisyfirvöldum í málum umsækjenda um alþjóðlega vernd.



Svar Áslaugar Örnu við fyrirspurn Helgu Völu má finna í heild sinni hér.