Innlent

Mæður og óléttar konur hvattar til þess að mótmæla í dómsmálaráðuneytinu

Sylvía Hall skrifar
Salka Gullbrá, skipuleggjandi mótmælanna, er sjálf gengin 22 vikur á leið. Hún segir íslenskar mæður njóta verndar hér á landi og því hafi verið átakanlegt að sjá aðra ólétta konu sæta allt annarri meðferð.
Salka Gullbrá, skipuleggjandi mótmælanna, er sjálf gengin 22 vikur á leið. Hún segir íslenskar mæður njóta verndar hér á landi og því hafi verið átakanlegt að sjá aðra ólétta konu sæta allt annarri meðferð. Vísir

Boðað hefur verið til mótmæla í dómsmálaráðuneytinu á morgun klukkan 15 vegna brottvísunar albanskrar fjölskyldu sem vísað var úr landi á þriðjudag. Að sögn skipuleggjenda eru mæður og óléttar konur sérstaklega hvattar til þess að mæta og sýna samstöðu, enda myndu þær aldrei þurfa að sæta svona meðferð, en allir séu þó velkomnir.

Brottvísun fjölskyldunnar hefur vakið hörð viðbrögð en um er að ræða albanskt par og tveggja ára son þeirra. Konan, sem var gengin 36 vikur á leið, hafði fengið vottorð frá heilbrigðisstarfsmönnum þar sem fram kom að hún væri slæm af stoðkerfisverkjum og „ætti erfitt með langt flug“.

Sjá einnig: Óttaðist um fjölskyldu sína og heilsu barnsins 

Salka Gullbrá Þórarinsdóttir boðaði til mótmælanna á Twitter og hvatti sérstaklega ófrískar konur og mæður með ung börn til þess að mæta og mótmæla brottvísuninni. Hún segir fréttir þriðjudagsins hafa verið henni þungbærar, enda hún sjálf gengin 22 vikur á leið.




„Þegar þessar fréttir bárust af þessari brottvísun að morgni þriðjudags, þá sit ég heima komin 22 vikur á leið sjálf, drekkandi eitthvað hindberjaseyði því það á að vera gott fyrir legið og er hérna eins og blóm í eggi,“ segir Salka í samtali við Vísi. Hennar upplifun af meðgöngu hafi hingað til verið sú að allt kapp sé lagt á að hennar reynsla sé jákvæð og því hafi verið erfitt að horfa upp á það sem albanska konan þurfti að upplifa.

„Ég er borgari sem misbýður þessi meðferð á óléttri konu og ungu barni. Skaðinn er skeður í þessu máli en ég vil, eins og margir, að þetta komi ekki fyrir aftur. Það hefur ekkert komið frá Útlendingastofnun, hvorki í viðtali við formanninn né frá dómsmálaráðherra sem bendir til að þau hyggist grípa til einhverra aðgerða.“

Mynd sem No Borders Iceland birtu af konunni hjá lækni í mæðravernd. Mynd/No borders iceland

Ekki nóg að skrifa reiðan status 

Að sögn Sölku hefur hún fundið fyrir því að margir séu á sömu skoðun og hún. Fólki blöskri þessi meðferð á fjölskyldunni og það sé kominn tími til þess að grípa til aðgerða og sýna að almenningur líði ekki svona framkomu í garð hælisleitenda.

„Íslenskar konur, við eigum rétt á vernd og mér blöskraði að þessi kona ætti ekki rétt á því að njóta vafans, komin 36 vikur á leið. Það koma svona mál upp með reglulegu millibili og mig langaði að gera meira en að sitja heima og skrifa reiðan status og ég veit að margir eru að hugsa á þeim nótum.“

Hún hafi upphaflega fengið hugmyndina á þriðjudag og varpað henni fram á Twitter við góðar undirtektir. Það sé því ljóst að fleiri séu á sömu skoðun og fullt tilefni til þess að fólk sýni það í verki að samfélagið samþykki ekki að þetta komi fyrir aftur.




Hún ítrekar þó að allir séu velkomnir að mæta og mótmæla og krefjast breytinga á verklagi í málefnum hælisleitenda. Það sé ekki boðlegt að slík máli komi upp með reglulegu millibili og átakanlegt að hugsa til þess að ung fjölskylda hafi verið send úr landi, þvert á ráðleggingar læknis. Almenningur verði því að leggja stjórnvöldum línurnar og krefjast breytinga.

„Ef maður er að horfa á þetta sem manneskja en ekki regluverk, þá er þetta bara óboðlegt. Það skiptir mig ekkert máli ef það eru einhverjar reglur sem þarf að breyta, þá á bara að breyta þeim. Ef það var eitthvað verklag sem þótti í lagi þarna, þá er það ekki í lagi. Það er auðséð á viðbrögðum fólks við þessu, okkur finnst þetta ekki í lagi.“


Tengdar fréttir

Dómsmálaráðherra segir nauðsynlegt að skoða hvað megi betur fara

Dómsmálaráðherra er ánægð með að landlæknir og Útlendingastofnun ætli að skoða hvernig bæta megi ferla við heilsufarsmat á fólki sem bíði brottflutnings frá landinu. Einstaklingsbundið mat verði að liggja þar á bakvið en mikill fjöldi mála sé afgreiddur á hverju ári.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.