Evo Morales hefur sagt af sér sem forseti Bólivíu. Morales greindi frá afsögninni í sjónvarpsávarpi fyrr í kvöld.

Yfirmaður bólivíska hersins hafði áður hvatt Morales til að segja af sér en mikil mótmæli hafa verið í landinu síðustu vikurnar eftir að alþjóðlegir eftirlitsaðilar settu út á framkvæmd forsetakosninganna í síðasta mánuði. Morales lýsti þar yfir sigri.

Yfirlýsing Williams Kaliman, yfirmanns hersins, kom nokkrum klukkustundum eftir að Morales samþykkti að boðað yrði til nýrra kosninga í landinu.

Formaður landskjörstjórnar Bólivíu hefur sömuleiðis sagt af sér, líkt og varaforsetinn Alvaro Garcia Linera. Fjölmargir héldu útá götur höfuðborgarinnar til að fagna eftir að Morales tilkynnti um afsögn sína.

Eftirlitsaðilar á vegum Stofnunar amerískra ríkja sögðu ljóst úrslitum hafi verið hagrætt. Morales hefur þó hafnað því að hafa haft rangt við, en ásakanir fóru á flug eftir að hlé var gert á talningu atkvæði í heilan sólarhring. Niðurstaðan sem kynnt var var á þá leið að Morales hafi rétt svo hlotið nægilega mörg atkvæði til að sleppa við að haldið yrði önnur umferð í forsetakosningunum.

Vinstrimaðurinn Morales tók við embætti forseta Bólivíu árið 2006, en hann var fyrsti maðurinn af frumbyggjaættum til að gegna embættinu.