Fótbolti

Einkunnir eftir sigurinn á Moldóvu: Birkir bestur

Íþróttadeild skrifar
Birkir var maður leiksins í Moldóvu.
Birkir var maður leiksins í Moldóvu. vísir/getty

Ísland vann Moldóvu, 1-2, í Kísenev í lokaleik sínum í H-riðli undankeppni EM 2020 í kvöld.

Ísland endaði í 3. sæti riðilsins með 19 stig. Íslenska liðið fer í umspil um sæti á EM í mars á næsta ári. Það kemur í ljós á föstudaginn hverjum Ísland mætir í undanúrslitum umspilsins.

Birkir Bjarnason, besti maður vallarins, kom Íslandi yfir á 17. mínútu eftir sendingu frá Mikael Neville Anderson. Staðan var 0-1 í hálfleik, Íslendingum í vil.

Nicolae Milinceanu jafnaði fyrir Moldóvu á 56. mínútu en níu mínútum síðar skoraði Gylfi Þór Sigurðsson sigurmark Íslands. Hann klúðraði svo vítaspyrnu á 78. mínútu.

Eins og áður sagði var Birkir bestur á vellinum. Mikael og Gylfi áttu einnig góðan leik.

Einkunnagjöf Vísis má sjá hér fyrir neðan.

Byrjunarliðið:

Hannes Þór Halldórsson, markvörður 6
Moldóvar áttu nokkrar hættulegar fyrirgjafir sem Hannes greip af öryggi. Gat ekkert gert í markinu sem Milinceanu skoraði.

Guðlaugur Victor Pálsson, hægri bakvörður 5
Gaf Sergiu Platica alltof mikinn tíma á vinstri kantinum, m.a. í markinu. Bauð upp á lítið í sókninni.

Sverrir Ingi Ingason, miðvörður 5
Vonbrigðaframmistaða hjá Sverri. Frekar óöruggur og illa staðsettur í markinu.

Ragnar Sigurðsson, miðvörður 6
Las leikinn vel og lék vel í fyrri hálfleik. Ekki nógu góður í þeim seinni og leit ekki vel út í dauðafærinu sem Vitalie Damascan fékk. Hefði líka getað gert betur í markinu.

Ari Freyr Skúlason, vinstri bakvörður 6
Allar bestu sóknir Íslands í fyrri hálfleik komu upp vinstri kantinn. Fékk mikinn tíma og pláss og nýtti það að mestu vel. Átti stóran þátt í fyrsta markinu. Minna áberandi í seinni hálfleik.

Arnór Sigurðsson, hægri kantmaður 6
Var lítið í boltanum eins og gegn Tyrklandi en gerði vel í sigurmarkinu og fiskaði vítið.

Gylfi Þór Sigurðsson, miðjumaður 7
Skoraði sigurmarkið og hefði hæglega geta skorað fleiri mörk. Klúðraði vítaspyrnu í seinni hálfleik. Átti nokkrar hættulegar tilraunir eftir það.

Birkir Bjarnason, miðjumaður 8
Skoraði og átti skot í slá og stöng. Var allt í öllu í íslenska liðinu meðan hann var inni á miðjunni. Færði sig út á vinstri kantinn eftir að Mikael fór af velli. Frábær í síðustu fjórum leikjunum í undankeppninni.

Mikael Neville Anderson, vinstri kantmaður 7
Lagði upp markið fyrir Birki. Líflegur, vel spilandi og flinkur leikmaður. Fékk að finna fyrir því og þurfti á endanum að fara meiddur af velli.

Jón Daði Böðvarsson, framherji 6
Nokkrir kröftugir sprettir en ekki ógnandi upp við markið. Betri í seinni hálfleik en þeim fyrri. Átti þátt í öðru markinu.

Kolbeinn Sigþórsson, framherji 5
Fór meiddur af velli á 29. mínútu. Hafði lítið gert fram að því.

Varamenn:

Viðar Örn Kjartansson - 5 (Kom inn fyrir Kolbein á 29. mínútu)
Komst í dauðafæri skömmu eftir að hann kom inn á en Alexei Koselev varði skot hans. Fyrirgjöf hans skapaði sigurmarkið.

Samúel Kári Friðjónsson - 6 (Kom inn fyrir Mikael á 55. mínútu)
Moldóva jafnaði skömmu eftir að Samúel kom inn á. Jafnaði sig fljótt á því og lét boltann ganga vel.

Hörður Björgvin Magnússon - (Kom inn fyrir Birki á 87. mínútu)
Spilaði of lítið til að fá einkunn.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.