Fyrrverandi ruðningskappinn Orenthal James Simpson, best þekktur sem OJ, hefur höfðað mál gegn hótel-spilavíti í Las Vegas og sakar starfsmenn hótelsins um ærumeiðingar eftir að þau láku upplýsingum í slúðurmiðilinn TMZ. AP greinir frá.



Simpson hefur, eins og flestir vita, komist í kast við lögin áður á sinni lífsleið. Árið 1995 var Simpson sýknaður af morðinu á fyrrverandi eiginkonu sinni Nicole og vini hennar Ron Goldman. Þá sat Simpson inni í níu ár eftir vopnað mannrán í Las Vegas árið 2007. Simpson var dæmdur í allt að 33 ára fangelsi árið 2008 en var látinn laus í október 2017.



Simpson, sem er enn á skilorði, segir að hann ásamt vini sínum hafi verið bannaðir frá Cosmopolitan hótelinu án þess að hafa verið gefin ástæða fyrir. Þeir hafi setið að snæðingi á steikhúsi hótelsins þegar þeim var gert að yfirgefa svæðið. Simpson segist hvorki hafa verið með ólæti né valdið skemmdum á eigum hótelsins.



Lögmaður Simpson segir að orðspor skjólstæðings síns hafi beðið hnekki eftir að starfsfólk hótelsins sagði Simpson hafa verið ölvaðan og með ólæti á hótelbarnum í samtölum við slúðurmiðilinn TMZ.



Atvikið sem um ræðir gerðist einungis um sex vikum eftir að Simpson var sleppt úr fangelsi. Í ákærunni stendur að Simpson hafi eingöngu verið til fyrirmyndar á meðan hann er á skilorði