Fram­kvæmdum við Hverfis­götu á að ljúka um miðjan nóvember

Vinnu vegna framkvæmda á Hverfisgötu í Reykjavík, frá Smiðjustíg og niður fyrir Ingólfsstræti, á að ljúka um miðjan nóvember.

Þetta kemur fram í tilkynningu frá Reykjavíkurborg. Framkvæmdirnar hafa dregist mikið en þær hófust í maí og átti upphaflega að vera lokið í ágúst. Hafa rekstaraðilar á svæðinu harðlega gagnrýnt upplýsingagjöf og seinaganginn vegna framkvæmdanna.

„Í næstu viku verður unnið að lokafrágangi gangstéttar og hjólastígs við norðanverða Hverfisgötu við Safnahús og Þjóðleikhúsið. Steinlagt torg fyrir framan Þjóðleikhúsið verður tilbúið í lok fyrstu viku nóvember og verður opnað fyrir umferð í beinu framhaldi.

Vinnu við frágang gangstéttar og hjólastígs að sunnanverðu á að ljúka um miðjan nóvember,“ segir í tilkynningunni frá borginni.

Upplýsingafulltrúi Reykjavíkurborgar hefur áður sagt að helsta ástæða þess að verkið dróst hafi verið vegna lagnavinnu.