Innlent

Flugvélar sátu fastar í Keflavík vegna veðurs

Kristín Ólafsdóttir skrifar
Vélarnar eru frá mismunandi flugfélögum, að sögn upplýsingafulltrúa Isavia. Mynd er úr safni.
Vélarnar eru frá mismunandi flugfélögum, að sögn upplýsingafulltrúa Isavia. Mynd er úr safni. Vísir/vilhelm

Níu flugvélar frá ýmsum flugfélögum sátu fastar á Keflavíkurflugvelli vegna veðurs nú um tíuleytið, samkvæmt upplýsingum frá Isavia. Þá hefur flugferðum einnig verið frestað í morgun vegna vindhraða í Keflavík.

Guðjón Helgason upplýsingafulltrúi Isavia segir í samtali við Vísi að vindhraði á flugvellinum sé kominn yfir 50 hnúta. Þegar svo ber undir eru landgöngubrýr teknar úr notkun af öryggisástæðum. Þær verður ekki hægt að nota á ný fyrr en vind lægir, sem Guðjón er ekki viss um hvenær verður.

Á meðan veðrið er enn slæmt sitja farþegar í a.m.k. átta flugvélum nú fastir við flugstöðvarbygginguna. Um er að ræða flugvélar sem komið hafa inn til lendingar í morgun.

Á heimasíðu Isavia má jafnframt sjá að ferðum frá Keflavíkurflugvelli, allt frá klukkan 8:30 í morgun, hefur verið frestað til a.m.k. 11:40.

Samkvæmt upplýsingum frá Veðurstofu Íslands mun vind lægja töluvert á Reykjanesi fljótlega eftir hádegi og því má gera ráð fyrir að einhver hreyfing komist á flug til og frá Keflavík um það leyti. Áfram verður þó allhvass vindur á svæðinu fram eftir degi.

Uppfært klukkan 12:21:
Landgöngubrýr á Keflavíkurflugvelli voru teknar aftur í notkun um klukkan hálf 12, samkvæmt upplýsingum frá Isavia. Þá er búið að hleypa öllum frá borði úr flugvélunum sem biðu við flugstöðvarbygginguna í morgun og verið að koma öllu á flugvellinum í samt horf.

Fréttin hefur verið uppfærð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.