Innlent

Ríkislögreglustjóri mætti við þriðja mann á leigubíl

Jakob Bjarnar og Nadine Guðrún Yaghi skrifa
Haraldur Johannessen mætti á fund í dómsmálaráðuneytið við Ingólfsstræti við þriðja mann. Með honum í leigubílnum voru þeir Jón Bjartmarz yfirlögregluþjónn og Jónas Ingi Pétursson fjármálastjóri.
Haraldur Johannessen mætti á fund í dómsmálaráðuneytið við Ingólfsstræti við þriðja mann. Með honum í leigubílnum voru þeir Jón Bjartmarz yfirlögregluþjónn og Jónas Ingi Pétursson fjármálastjóri. Vísir/Vilhelm

Haraldur Johannessen ríkislögreglustjóri mætti nú fyrir stundu í dómsmálaráðuneytið þar sem hann mun funda með nýjum dómsmálaráðherra, Áslaugu Örnu Sigurbjörnsdóttur um stöðuna sem upp er komin innan lögreglunnar.

Átök eru milli ríkislögreglustjóra og svo Arinbjarnar Snorrasonar, formanns Lögreglufélagsins, sem vill að Haraldur víki meðan Ríkisendurskoðun gerir heildarúttekt á embættinu. Arinbjörn hefur látið hafa eftir sér að félagsmenn hafi ítrekað kvartað undan störfum Haralds; að ríkislögreglustjóri stundi ógnar- og óttastjórnun.

Haraldur fundar nú með dómsmálaráðherra en með honum á fundinn mættu Jón Bjartmarz og Jónas Ingi Pétursson. visir/vilhelm

Haraldur mætti á fundinn við þriðja mann en með honum voru þeir Jón Bjartmarz yfirlögregluþjónn og Jónas Ingi Pétursson fjármálastjóri hjá ríkislögreglustjóra. Þeir komu allir saman á leigubíl.

Haraldur sagði, í stuttu samtali við fréttamenn, ætla að ræða stöðuna og málefni lögreglunnar við ráðherra eins og hún horfði við sér. Hann vildi ekki svara spurningum um það hvort hann væri að íhuga stöðu sína sérstaklega og sagði spurður að það yrði að koma í ljós hvort hann myndi veita viðtöl eftir fundinn.

Haraldur Johannessen ríkislögreglustjóri fundar nú með ráðherra en hann mætti í dómsmálaráðuneytið við þriðja mann. visir/vilhelm

Segja má að upp úr hafi soðið um helgina í kjölfar viðtals sem Haraldur veitti Morgunblaðinu um helgina. Þar sagði Haraldur meðal annars að ef til starfsloka kæmi af hans hálfu myndi það kalla á enn ítarlegri umfjöllun af hans hálfu um valdabaráttu á bak við tjöldin.

Bætti hann við að verið væri að dreifa persónlegum sögum af honum, sem ættu sér enga stöð í raunveruleikanum. Sögurnar kæmu frá fólki sem hann hefði þurft að taka á í gegnum tíðina.

„Ég held að þetta endurspegli bara það sem lögreglumenn hafa verið að segja, þetta eru hans viðbrögð við því þegar að menn hafa leitað til hans eða komið fram með athugasemdir, þá eru þetta viðbrögðin. Það að svona hátt settur maður í embættisgeiranum skuli koma fram með svona hluti, ég bara trúi því ekki að þessi maður geti mætt til vinnu á mánudaginn og brosað framan í samstarfsfólk sitt. Ég bara trúi því ekki,“ sagði Arinbjörn Snorrason við Vísi um helgina.

Lögreglustjórar landsins funduðu í morgun og ræddu þá umfjöllun fréttamiðla síðustu daga um embætti ríkislögreglustjóra. Niðurstaða þess fundar var sú að tjá sig ekki frekar um málið opinberlega að svo stöddu.


Tengdar fréttir

Arin­björn segist aldrei hafa séð annað eins innan lög­reglunnar

Formaður lögreglufélags Reykjavíkur segir að framkoma Haraldar Johannessen, ríkislögreglustjóra, í viðtali í Morgunblaðinu í dag, sé honum langt í frá til framdráttar. Þar komi fram óbeinar hótanir í garð starfsmanna lögregluembættanna sem eigi ekki að viðgangast.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.