Fótbolti

Kjartan Henry skoraði tvö og Guðmundur lagði upp tvö

Ingvi Þór Sæmundsson skrifar
Kjartan Henry var hetja Velje gegn Skive.
Kjartan Henry var hetja Velje gegn Skive. vísir/getty

Kjartan Henry Finnbogason skoraði bæði mörk Velje í 2-1 sigri á Skive í dönsku B-deildinni í dag.

Kjartan Henry hefur skorað fjögur mörk á tímabilinu og er næstmarkahæstur í deildinni. Velje er í 5. sæti með átta stig.

Guðmundur Þórarinsson lagði upp tvö mörk þegar Norrköping rúllaði yfir Helsingborg, 5-0, í sænsku úrvalsdeildinni.

Þetta var þriðji sigur Norrköping í röð en liðið er í 6. sæti deildarinnar með 37 stig. Ísak Bergmann Jóhannesson, sem skoraði í bikarleik með Norrköping í síðustu viku, var ekki í leikmannahópi liðsins í dag.

Daníel Hafsteinsson lék síðustu mínúturnar fyrir Helsingborg sem hefur tapað þremur leikjum í röð og nálgast fallsvæðið.

Kolbeinn Sigþórsson kom inn á sem varamaður á 82. mínútu þegar AIK bar sigurorð af Östersund, 1-3. Þegar Kolbeinn kom inn á var staðan 1-1. AIK skoraði svo tvö mörk undir lokin og tryggði sér sigur.

AIK er í 2. sæti deildarinnar 43 stig, einu stigi á eftir toppliði Djurgården.

Þá vann Kristianstad 2-0 sigur á Djurgården í Íslendingaslag í sænsku úrvalsdeildinni.

Svava Rós Guðmundsdóttir og Sif Atladóttir voru báðar í byrjunarliði Kristianstad sem er í 6. sæti deildarinnar með 25 stig. Elísabet Gunnarsdóttir er þjálfari Kristianstad sem hefur unnið fimm af átta heimaleikjum sínum á tímabilinu.

Ingibjörg Sigurðardóttir lék allan leikinn fyrir Djurgården sem er í 10. sæti með níu stig. Guðrún Arnardóttir sat á varamannabekk liðsins í dag. Djurgården hefur tapað sjö leikjum í röð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.