Elsku Vogin mín, þú ert svo dásamleg í því að aðstoða aðra í tilfinningalegu veseni og vandræðum, svo engum dettur í eina mínútu í hug hversu ofboðslega viðkvæm þú ert. Þú ert skapmikill sálfræðingur bæði í orði og á borði og það eru eins og örlög þín að ná góðum árangri, svo reiði er eina hindrunin sem getur stoppað þig.



Næstu þrír mánuðir eru ofboðslega mikilvægir í lífi þínu því þeir færa þér grunninn að því lífi sem þú vilt lifa og þú sérð betur hversu ótrúlega heppin persóna þú ert, en þú þarft samt að taka stjórnina í þínar eigin hendur, láta hlutina gerast og ýta fólki áfram eins og sá sanni leiðtogi sem þú ert.



Þú átt það til að vera of skyldurækin og þarft líka að hugsa um þínar eigin langanir, þrár og ekki gleyma að sinna sjálfri þér. Þessi tími verður svo magnaður og máttur þinn eykst um helming, eins og þú fáir óhindraðan kraft til að vaða í gegnum eld og brennistein og þótt þú komir sveitt í mark verður þú svo ofboðslega ánægð með sjálfa þig. Þessi ánægja mun geisla út frá þér eins og sólin og fólk tekur eftir þér hvert sem þú ferð því það elskar að fylgjast með þér og er að bíða eftir því hvað þú gerir næst því þú átt þér miklu fleiri aðdáendur en þú heldur.



Þú verður svo tilbúin að gefa þig alla í það sem þú ert að gera um leið og þú þarft á því að halda, hafðu engar áhyggjur af því, áhyggjur eru til einskis nýtar hvort sem er. Þú ert svo örvandi og nýtur þín best við stjórnvöllinn, bæði heima og í vinnu, þolir ekki leti og pirrar þig á annarra óskipulagi og leti og þá kemur reiðin. Teldu upp að tíu áður en þú lætur pirringinn í ljós því þú sérð svo ofboðslega eftir því þegar þú særir eða spælir aðra, ef það dugar ekki til teldu upp að tíu, tuttugu eða þrjátíu, því þá færðu heimsins bestu umsögn og virðingu frá fólki í kringum þig og það áttu svo sannarlega skilið.



Knús og kossar, Sigga Kling

Vog 23. september - 22. október

Kári Árnason, landsliðsmaður í fótbolta, 13. október 

Hjörvar Hafliðason, fjölmiðlamaður, 6. október 

Svanhildur Hólm Valsdóttir, aðstoðarmaður ráðherra og sjónvarpskona, 11. október 

Hanna Birna Kristjánsdóttir, stjórnmálamaður, 12. október 

Lilja Dögg Alfreðsdóttir, mennta- og menningamálaráðherra, 4. október 

Ragga Gísla, tónlistarmaður, 7. október 

Steinn Steinarr, skáld, 13. október 

Margret Thatcher, 13. október 

Fanney Birna Jónsdóttir, fjölmiðlakona, 21. október 

Friðrik Dór, tónlistarmaður, 7. október 

JóiPé, tónlistarmaður, 2. október 

Jóhanna Vigdís Hjaltadóttir, fréttaþulur, 19. október 

Kim Kardashian, raunveruleikastjarna, 21. október