Skutu á rússneska herþotu í lofthelgi Suður-Kóreu

Suður-kóreski flugherinn skaut viðvörunarskotum að rússneskri A-50-orrustuþotu sem fór inn í lofthelgi landsins í dag. Formaður þjóðaröryggisráðs Suður-Kóreu hefur mótmælt flugi rússnesku vélarinnar harðlega við þjóðaröryggisráð Rússlands.

Þrjár rússneskar og tvær kínverskar herþotur fóru inn á loftvarnasvæði Suður-Kóreu þar sem erlend loftför þurfa að gera grein fyrir sér. Ein rússnesku vélanna hætti sér lengra inn í lofthelgina sjálfa, yfir Dokdo/Takeshima-eyjum sem Suður-Kóreumenn hafa á valdi sínu en Japanir gera tilkall til, um klukkan 9:00 að staðartíma, að sögn breska ríkisútvarpsins BBC.

F-15k og F-16k-orrustuþotur voru sendar til móts við rússnesku þotuna og skutu þær blysum og viðvörunarskotum að henni. Þegar rússneska þotan sneri aftur inn í svæðið nokkrum mínútum síðar skutu suður-kóresku þoturnar fleiri skotum að henni.

Atvikið er sagt það fyrsta sinna tegundar á milli Rússlands og Suður-Kóreu. Skrifstofa forseta Suður-Kóreu segir hann líta á atvikið alvarlegum augum. Endurtaki það sig muni Suður-Kóreumenn bregðast harðar við. Hvorki Rússar né Kínverjar hafa tjáð sig um atvikið enn sem komið er.