Sturridge í bann fyrir brot á veðmálareglum
Daniel Sturridge hefur verið dæmdur í tveggja vikna bann frá fótbolta og þarf að borga háa sekt fyrir brot á veðmálareglum.
Framherjinn, sem hefur spilað fyrir Liverpool, Manchester City og Chelsea, var dæmdur í sex vikna bann en fjórar þeirra voru skilorðsbundnar og því má hann spila á ný 31. júlí næst komandi. Einnig þarf hann að borga 75 þúsund pund í sekt.
Enska knattspyrnusambandið ætlar að áfrýja dómnum en níu af 11 ákærum á hendur Sturridge var vísað frá.
Sturridge var hins vegar fundinn sekur um að hafa ráðlagt bróður sínum að veðja á möguleg vistaskipti Sturridge til Sevilla og fyrir að hafa gefið bróður sínum innherjaupplýsingar.
Sturridge var á mála hjá Liverpool á síðasta tímabili og fagnaði sigri í Meistaradeild Evrópu með félaginu, án þess þó að hafa tekið þátt í úrslitaleiknum. Hann var síðar í júní leystur undan samningi og er hann enn án félags.
Tengdar fréttir
Viðbrögð varamanna Liverpool í leikslok í Madrid sýndu hvað Klopp hefur búið til
Allir leikmenn Liverpool geisluðu að gleði í lok úrslitaleiks Meistaradeildarinnar og þá skipti engu máli þótt þeir höfðu ekki spilað í eina sekúndu í leiknum. Þetta vakti sérstaka athygli blaðamanns á Telegraph.
Fullt af leikmönnum í ensku úrvalsdeildinni eru samningslausir eða á förum
Íslenski landsliðsfyrirliðinn Aron Einar Gunnarsson er ekki eini leikmaðurinn í ensku úrvalsdeildinni sem er að renna út á samning í sumar.
