Maradona hættur þjálfun að læknisráði

Diego Maradona hefur látið af störfum sem knattspyrnustjóri mexíkóska liðsins Dorados de Sinaloa af heilsufarslegum ástæðum.

Maradona, sem er 58 ára gamall, þarf vart að kynna, enda goðsögn í fótboltaheiminum. Hann hefur stýrt Dorados, sem spilar í annari deild í Mexíkó, síðan í september á síðasta ári. Undir stjórn hans fór Dorados tvisvar í umspil um sæti í efstu deild.

„Maradona ætlar að einbeita sér að heilsunni að læknisráði og gangast undir tvær aðgerðir, á öxl og hné. Hann þakkar Dorados fjölskyldunni fyrir allt og heldur áfram að dreyma um framtíðina,“ sagði lögfræðingur Maradona á Twitter.

Juntos sorprendimos al mundo. Demostramos que el fútbol es pasión y corazón.

Con el Diego de Sinaloa, #LaHicimosDeDiez.

¡Gracias por todo, Jefe! ¡Recupérate y nos vemos pronto! pic.twitter.com/A3g77k3wIM

— #ConElPezHastaElFinal (@Dorados) June 13, 2019

Argentínumaðurinn og heilsa hans hefur verið nokkuð áberandi í fjölmiðlum síðustu árin, sérstaklega í kringum HM í Rússlandi síðasta sumar.

Hann þurfti læknisaðstoð eftir leik Argentínu og Nígeríu á HM eftir að hafa látið illum látum í stúkunni og gefið stuðningsmönnum Nígeríu fingurinn. Þá reykti hann vindil í stúkunni á leik Íslands og Argentínu.