Strætó fauk út af við Litlu Kaffistofuna

Strætisvagn sem ekið var á leið 51, á milli Reykjavíkur og Hafnar, fauk af veginum í Draugahlíðarbrekku ofan við Litlu Kaffistofuna í kvöld. Engin slys urðu á fólki en fáir farþegar munu hafa verið í vagninum. Slæmt veður er á svæðinu.

Guðmundur Heiðar Helgason, upplýsingafulltrúi Strætó, segir að senda hafi átt annan vagn eftir farþegum en þeir hafi þó fengið far austur fyrir fjall á einkabílum sem verið var að aka austur.

Til stendur að sækja vagninn á morgun, þegar veðrinu hefur slotað og birtuskilyrði eru betri.