Ronaldo vill reyna fyrir sér í Hollywood

Cristiano Ronaldo vill feta í fótspor Vinnie Jones, Eric Cantona og David Beckham þegar hann leggur fótboltaskóna á hilluna og reyna fyrir sér í Hollywood.

Hinn 34 ára Ronaldo er farinn að huga að lífi eftir ferilinn og ræddi hann framtíðina á ráðstefnu í Dubai.

„Ég vona að ég lifi 50 ár til viðbótar og ég vil byrja að undirbúa mig fyrir hindranir framtíðarinnar,“ sagði Ronaldo.

„Til dæmis að fara með hlutverk í mynd í Hollywood.“

„En þú þarft að undirbúa þig vel, vera góður í ensku og geta átt góða frammistöðu án þess að vera stressaður.“

Ronaldo er einn besti fótboltamaður síðasta áratugs en hann er enn í mjög góðu formi, hann er kominn með 10 mörk í 14 leikjum í ítölsku deildinni í vetur.