Stóri Sam fær orð í eyra: Platar ekki stuðningsmennina og á að nota Gylfa í tíunni

Tap Everton á móti Watford í ensku úrvalsdeildinni um síðustu helgi hefur ekki farið vel í pistlahöfund Liverpool Echo sem jafnframt er fyrrum leikmaður Everton liðsins.

Michael Ball lék yfir 120 leiki með Everton á árunum 1996 til 200. Hann endaði ferillinn hjá Leicester City fyrir sex árum en hefur skrifað pistla um Everton liðið í Bítlaborgarfjölmiðilinn Liverpool Echo.

Það er ljóst á orðum Michael Ball að hann hefur enga þolinmæði lengur fyrir knattspyrnustjóranum Sam Allardyce og hann vill fá nýjan mann í stjórastólinn í sumar.

„Ég veit að Sam kom til félagsins að klára ákveðið verkefni en viljum við sjá svona fótbolta hjá liðinu á næsta tímabili?" spyr Ball í pistli sínum í Liverpool Echo.

Ball segir enga hættu á því lengur að Everton falli úr deildinni en telur það mikilvægt að liðið farið að spila betri fótbolta og þann bolta sem liðið á að spila í framtíðinni. Það sé ekki þessi neikvæði bolti sem Everton er að spila undir stjórn Sam Allardyce.

Ball heldur svo áfram að gagnrýna stóra Sam og eitt það versta segir að Allardyce sé ekki einu sinni að reyna að vinna leiki heldur sé hann aðallega bara að reyna að forðast tap.

As hard hitting as ever from ECHO #EFC columnist @bally03.

A must read https://t.co/TtPTjEHmOW

— Everton FC News (@LivEchoEFC) February 26, 2018

Ball bendir á þá staðreynd að stuðningsmenn Everton sætti sig við svona metnaðarleysi. Að ná í jafntefli á útivelli á móti Watford eru ekki góð úrslit í auga þeirra en Ball sá ekki betur en það hafi verið markmiðið í tapleiknum á móti Watford.

„Everton fékk tvær vikur til að undirbúa sig fyrir Watford leikinn en það var ljóst eftir fimmtán mínútur að ekkert vit var í því sem liðið var að gera,“ skrifaði Ball og hann lætur stjórann heyra það.

„Sam er reyndur stjóri og reynir að segja réttu hlutina í eyru rétta fólksins en hann platar ekki stuðningsmennina. Ef þú setur upp leik á móti Watford með það markmið að tapa ekki en tapar samt þá er augljóst að taktíkin er ekki að ganga upp,“ skrifaði Ball.

„Við verðum að fara að spila með tvo menn frammi og liðið verður að sækja með einhverjum krafti. Það hjálpar engum að spila svona neikvæðan fótbolta,“ skrifar Ball og hann vill að dýrasti leikmaður félagsins spili sína stöðu.

„Ég vil líka að leikmennirnir spili í sínum réttu stöðum á vellinum og Gylfi Sigurðsson á að vera í tíunni,“ skrifaði Michael Ball en þá á hann við að Gylfi spili framarlega á miðjunni og fyrir aftan fremstu menn. Þar er hann bestur eins og við höfðum séð hjá Swansea og íslenska landsliðinu.

Gylfi hefur verið mikið út á kanti hjá Everton á tímabilinu sem er mikil sóun á hæfileikum íslenska landsliðsmannsins enda er Gylfi aldrei betri en þegar hann getur nýtt sér hraða leikmenn á báðum vængjum sem og ógnandi fremsta mann.