Messan tók fyrir Ederson í marki Man. City: Hann býr til allar sóknirnar í þessu liði

Jóhann Berg Guðmundsson tókst að skora framhjá Ederson Santana de Moraes, markverði Manchester City, um helgina en brasilíski markvörðurinn fékk engu að síður mikið hrós í Messunni í gær.

Guðmundur Benediktsson sjá um Messuna í gær og gestir hans voru þeir Hjörvar Hafliðason og Reynir Leósson. Þeir tóku meðal annars fyrir leik Burnley og toppliðs Manchester City þar sem íslenski víkingurinn kom í veg fyrir sigur lærisveina Pep Guardiola.

Hjörvar Hafliðason er mjög ánægður með Ederson, markvörðinn sem Manchester City keypti frá Benfica í sumar. „Hann er ógeðslega góður og ofboðslega vanmetinn,“ byrjaði Hjörvar.

„Hann er besti fótboltamaðurinn í varnarlínu Manchester City. Það er hann sem býr til allar sóknirnar í þessu liði,“ sagði Hjörvar en fékk mikil viðbrögð.

„Rólegur,“ sagði Reynir og Guðmundur Benediktsson endurtók þessa fullyrðingu Hjörvars um þátttöku markvarðarins í sóknarleik markahæst liðs enska boltans.

„Hann er betri í fótbolta en bæði Nicolás Otamendi og Vincent Kompany,“ sagði Hjörvar.

Það má heyra þá félaga ræða mikilvægi Ederson (og rífast aðeins) í spilaranum hér fyrir ofan.