Zlatan skoraði í jafntefli og er orðinn næst markahæsti leikmaður deildarinnar

Zlatan Ibrahimovic skoraði í fjórða leiknum í röð fyrir LA Galaxy er liðið gerði jafntefli við Sporting Kansas í MLS-deildinni bandarísku í nótt.



Svíinn kom sínum mönnum yfir á 25. mínútu eftir að hafa skorað úr vítaspyrnu en Johnny Russell jafnaði leikinn fyrir Sporting Kansas á 83. mínútu.



Jafnteflið gæti reynst Galaxy dýrkeypt því liðið er nú einu stigi frá úrslitakeppninni þegar tvær umferðir eru eftir.



Mikil spenna er um síðustu tvö sætin í úrslitakeppninni í Vesturdeildinni en aðeins fjórum stigum munar á 5. sæti og 8. sæti.



Galaxy á eftir að mæta liðum í neðri hlutanum í Vesturdeildinni og er því enn góður möguleiki á að Zlatan og félagar leiki í úrslitakeppninni.



Zlatan hefur nú skorað 21 mark í MLS deildinni á tímabilinu en hann er næst markahæsti leikmaður deildarinnar.