Grasfrjó í hámarki

Minna hefur verið um frjókorn í lofti þetta sumar en fyrri ár. Ofnæmislæknir á Landspítalnum segir ofnæmið hrjá marga og það sé sérstaklega óþægilegt þegar fólk er á ferðalögum. Mikilvægt sé að styrkja ónæmiskerfið með því að taka inn vítamín og þá sérstaklega D-vítamín þegar sólarleysið er mikið.

Stærsta ferðamannahelgi ársins er í vændum, sjálf Verslunarmannahelgin, margir leggja land undir fót og skella sér á útihátíð eða í útilegu. Ferðalögin eru þó ekki einföld fyrir alla því þeir sem hafa frjókornaofnæmi þurfa að vara sig á grasfrjó í lofti sem er í hámarki um þessar mundir.

Sigurveig Sigurðardóttir, læknir á göngudeild ofnæmissjúkdóma á Landsspítalanum, segir sumarið hafa verið frekar þægilegt en algengt sé að fólk leiti á deildina í meira mæli í kringum Verslunarmannahelgina.

„Grasfrjókornið byrjar að koma um miðjan júní og síðan nær það hámarki núna í lok júlí og byrjun ágúst. Svo smá minnkar það þegar fer að líða á ágúst og er búið um það bil þegar ágúst er á enda, það fer eftir árferði,“ segir Sigurveig.

Sumum reynist erfitt að greina á milli sumarkvefs og frjóofnæmis. Einkenni ofnæmis í augum, nefi og gjarnan lungum koma yfirleitt fram á sama tíma á hverju ári.

Sigurveig segir fólk með ofnæmi þurfa að huga að mörgu áður en haldið er af stað í ferðalag svo ekki þurfi að flýja heim vegna ofnæmis.

„Þetta er útileguhelgi ársins, margir sem fara og liggja í tjaldi út í nátturunnu og eru þá kannski bara í miðju frjókornabeðinu,“ segir hún.

Mikilvægt sé að þeir sem þjáist af frjóofnæmi hafi lyf sín með sér í ferðalagið.

„Um að gera að byrja að taka þau áður en farið er í útileguna setja dropana í augun strax að morgni og aftur að kvöldi og úða í nefið á sér steraúðanum sem þau eiga og taka töflunar,“ segir hún.