Rooney hársbreidd frá D.C. United

Wayne Rooney er við það að ganga til liðs við bandaríska liðið D.C. United samkvæmt heimildum bandarísku fréttastofunnar ESPN.

Umboðsmenn Rooney hafa nú þegar komist að samkomulagi við bandaríska félagið, það gerðu þeir fyrir um mánuði síðan. Rooney hefur dvalið í Bandaríkjunum síðan tímabilinu lauk í Englandi og er nú alveg við það að samþykkja skiptin.

Fyrrum fyrirliði enska landsliðsins á eitt ár eftir af samningi sínum hjá Everton. Hann kom við sögu í 40 leikjum félagsins á síðasta tímabili þar sem hann gerði 11 mörk. Everton og nýi knattspyrnustjórinn Marco Silva ætla ekki að standa í vegi Rooney ákveði hann að fara til Bandaríkjanna.

Rooney er markahæsti leikmaður í sögu bæði Manchester United og enska landsliðsins.