Kim Kardashian átti frábæran fund með Donald Trump

Athafnakonan Kim Kardashian átti að sögn góðan og árangursríkan fund með Donald Trump Bandaríkjaforseta í gærkvöld. Trump birti á Twitter mynd af þeim saman á skrifstofu forsetans í Hvíta húsinu og sagði fundinn frábæran.

Tilefni fundarins var að ræða umbætur í fangelsismálum og þá sérstaklega mál 63 ára gamallar konu sem var dæmd í ævilangt fangelsi fyrir fíkniefnamisferli og hefur nú þegar afplánað rúm tuttugu ár.

Kardashian fékk áhuga á málinu þegar greint var frá því í fjölmiðlum og réði lögfræðinga til að aðstoða konuna. Hún er sögð hafa átt fjölda funda með Jared Kushner, tengdasyni Donalds Trump, um þetta sama mál. Þá hafi það kveikt áhuga hennar á dómsmálum almennt og því órétti sem margir glími við í bandaríska dómskerfinu.