Rússneskir útsendarar þóttust vera tölvuþrjótar ISIS

Rússneskir útsendarar þóttust vera tölvuþrjótar Íslamska ríkisins þegar þeir gerðu meðal annars árásir á fimm eiginkonur bandarískra hermanna og hótuðu að myrða þær og fjölskyldur þeirra. Útsendararnir umræddu hafa verið bendlaðir við tölvuárásir um allan heim.

Konurnar fimm fengu hótanirnar nærri samstundis þann 10. febrúar 2015. Ein þeirra heitir Angela Ricketts. Þann dag fékk hún skilaboð á Facebook.

„Kæra Angela. Blóðugan Valentínusardag. Við vitum allt um þig, eiginmann þing og börnin ykkar. Við erum ykkur nærri en þú getur ímyndað þér.“ stóð í skilaboðunum frá CyberCaliphate.

AP fréttaveitan, í samstarfi við öryggisfyrirtækið Secureworks, hefur fundið sannanir fyrir því að hópur rússneskra tölvuþrjóta sem í daglegu tali eru kallaði Fancy Bear eða APT28 gerði árásir á konurnar fimm. Ekki tölvuþrjótar Íslamska ríkisins. APT28 er rekinn af leyniþjónustu rússneska hersins, GRU.



Þetta er ekki í fyrsta sinn sem öryggissérfræðingar finna á milli CyberCaliphate og Fancy Bear og segir AP að öryggissérfræðingar séu sammála um að hóparnir tengist nánum tengslum. Sérfræðingar segja þennan tiltekna hóp hafa ráðist á tölvukerfi landsnefndar Demókrataflokksins í aðdraganda forsetakosninga Bandaríkjanna 2016 og þeir eru sömuleiðis sagðir hafa herjað á tölvukerfi Emmanuel Macron í aðdraganda forsetakosninganna í Frakklandi í fyrra.



Markmiðið með því að hóta konunum fimm var að ýta undir ótta í Bandaríkjunum við öfgamennina í Íslamska ríkinu og virðist sem að það hafi heppnast. Mikið var fjallað um konurnar fimm og skilaboðin sem þær fengu í fjölmiðlum í Bandaríkjunum.

„Tröllaverksmiðja“ Rússa ýtti svo undir þennan ótta, meðal annars, með fölsuðum fréttum og myndum

Sjá einnig: Upplýsingahernaður háður úr „Tröllaverksmiðju“ í Pétursborg



Frönsk sjónvarpsstöð varð fyrir árásum

Nokkrum vikum eftir að konunum bárust hótanir stöðvaðist útsending frönsku sjónvarpsstöðvarinnar TV5 Monde. Heimasíða sjónvarpsstöðvarinnar lá sömuleiðis niðrir og það eina sem sást þegar hún var opnuð var merki CyberCaliphate. Þetta var skömmu eftir að árásin á Charlie Hebdo var gerð og stakk innanríkisráðherra Frakklands fljótt upp á því að TV5 Monde væri fórnarlamb hryðjuverka.

Yfirmaður netöryggisstofnunnar Frakklands, Guillaume Poupard, neitaði hins vegar alfarið að styðja yfirlýsingu ráðherrans. Hann sagði allt of fljótt að segja til um uppruna árásarinnar og sagði enn fremur að niðurstaðan gæti komið fólki á óvart.

Skömmu seinna komust sérfræðingar að því að sönnunargögn í vefþjónum TV5 Monde bendu ekki til Mið-Austurlanda heldur til Moskvu.