Innlent

„Við viljum sjá konur í flugvirkjun“

Kristján Már Unnarsson skrifar
Hjálmar Árnason, framkvæmdastjóri Keilis, í flugskýli skólans á Keflavíkurflugvelli.
Hjálmar Árnason, framkvæmdastjóri Keilis, í flugskýli skólans á Keflavíkurflugvelli. Stöð 2/Egill Aðalsteinsson.

Við viljum sjá fleiri konur læra flugvirkjun, segir Hjálmar Árnason, framkvæmdastjóri Keilis, en innan við eitt prósent flugvirkja landsins eru konur. Rætt var við Hjálmar í fréttum Stöðvar 2.

Flugakademían er orðin um 40 prósent af starfsemi Keilis á Keflavíkurflugvelli, skólinn verður í vor kominn með fjórtán kennsluvélar, en er einnig með flugherma til að þjálfa flugmenn.

Keilir heldur einnig úti kennslu flugvirkja og hefur í því skyni komið sér upp aðstöðu þar sem sjá má hreyfla af öllum stærðum og gerðum, meira að segja af júmbóþotu, og þar er tékknesk orustuþota.

„Menn segja að fyrir hvern einn flugmann þurfi svona einn og hálfan flugvirkja. Og flugvirkjaskólar heimsins anna ekki eftirspurn,” segir Hjálmar, og segir skólann búinn að koma sér upp mjög góðri aðstöðu til námsins.

Hann segir mikla aðsókn í bæði flugvirkjanám og flugmannsnám og nánast allir bekkir Keilis séu fullir fram eftir þessu ári. Það lýsi bæði þörf flugfélaga og áhuga ungs fólks að fara í flugið; spennandi atvinnugrein, sem orðin sé ansi stór hérlendis.

Flugvirkjar í hinu nýja flugskýli Icelandair á Keflavíkurflugvelli skoða nýjustu þotu félagsins, Boeing 737 MAX 8. Stöð 2/Friðrik Þór Halldórsson.

Það vekur hins vegar athygli þegar horft er yfir vinnustað flugvirkja að þar eru yfirleitt bara karlmenn, enda eru íslenskir kvenflugvirkjar teljandi á fingrum annarrar handar. Af 560 félagsmönnum Flugvirkjafélags Íslands eru aðeins fjórar konur, samkvæmt upplýsingum félagsins; tvær hjá Icelandair, ein hjá Flugfélagi Íslands og ein sem starfar í Lúxemborg. 

„Við höfum nú verið að hvetja ekki síst konur til þess að fara í það starf. Það er einhvern veginn sú ímynd að þetta sé eitthvað svona karllægt starf. En það er alls ekki þannig. Þetta er starf sem hentar báðum kynjum og við höfum verið að leggja mikla áherslu á það að við viljum sjá konur í flugvirkjun, eins og öðrum störfum,” segir Hjálmar. 

Hér má sjá frétt Stöðvar 2:


Tengdar fréttir

Grunnlaunin um 440 þúsund krónur

Kjaraviðræður Flugvirkjafélags Íslands og Samtaka atvinnulífsins vegna Icelandair hafa ekki borið árangur en fundur hefur staðið yfir frá klukkan eitt í dag. Að óbreyttu hefst verkfall klukkan sex í fyrramálið.

Flugskýli Icelandair hrópar á fleiri flugvirkja

Hlutfall Suðurnesjamanna í viðhaldsstöð Icelandair á Keflavíkurflugvelli hefur fimmfaldast frá því flugskýlið var opnað. Skortur er nú á flugvirkjum. Það þótti ekki endilega sjálfsögð ákvörðun hjá Icelandair fyrir rúmum tuttugu árum að byggja upp fullkomna viðhaldsstöð fyrir flugflota sinn á Íslandi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.