Mourinho: Ég haga mér best af öllum

José Mourinho, stjóri Manchester United, segir að hann sé sá stjóri í deildinni sem hagi sér best á hliðarlínunni.

José Mourinho hefur oft á tíðum æst sig á hliðarlínunni í gegnum tíðina og fékk t.d. bann fyrir að sparka í brúsa á síðustu leiktíð en hann vill þó meina að hann hagi sér yfirhöfuð vel.

„Ég ætla mér að vinna verðlaunin fyrir það að haga mér best af öllum stjórunum í deildinni, mér er alvara,“ sagði Mourinho.

„Það eru til svo mörg verðlaun eins og t.d. leikmaður mánaðarins og stjóri mánaðarins og þess vegna finnst mér að þeir þurfi að búa til verðlaun fyrir þann stjóra sem hagar sér best á hliðarlínunni.“

„Ég er alveg handviss um það að ég myndi vinna. Ég hef ekki skapað nein vandræði á hliðarlínunni á þessu tímabili fyrir utan það þegar ég steig óvart inná völlinn gegn Southampton og fékk rautt spjald, það var það eina.“