Fyrst öldunga­deildar­þing­manna til að fæða barn

Bandaríski öldungadeildarþingmaðurinn og fyrrverandi hermaðurinn Tammy Duckworth hefur greint frá því að hún sé barnshafandi og eigi von á stelpu í apríl.

Duckworth verður fyrst sitjandi öldungadeildarþingmanna í Bandaríkjunum til að fæða barn, en hún verður fimmtug í mars næstkomandi.

Alls hafa níu þingkonur í Bandaríkjunum eignast barn á þeim tíma þegar þær hafa setið á þingi, en allar sátu þær í fulltrúadeild þingsins.

Duckworth tók sæti á þinginu fyrir tæpu ári. Hún varð þá fyrsta fatlaða konan til að taka sæti í öldungadeildinni, en hún missti báða fætur þegar þyrla sem hún flaug var skotin niður í Írak árið 2004.

Duckworth er Demókrati og þingmaður Illinois. Hún eignaðist fyrsta barn sitt árið 2014 með eiginmanni sínum Bryan Bowlsbey. Hún var þá 47 ára og gegndi embætti fulltrúadeildarþingmanns.