Reading fjórum stigum frá fallsæti eftir tap

Jón Daði Böðvarsson spilaði allan leikinn fyrir Reading sem mistókst að vinna fimmta leikinn í röð er liðið tapaði 3-1 fyrir Sheffield United á heimavelli í kvöld.

Billy Sharp kom Sheffield yfir snemma leiks og Mark Duffy kom gestunum í 2-0 fyrir hlé. Omar Richards minnkaði muninn í upphafi síðari hálfleik, en nær komust heimamenn ekki.

Billy Sharp gerði út um leikinn með öðru marki sínu og þriðja marki Sheffield á 63. mínútu. Lokatölur 3-1 sigur Sheffield sem er í sjötta sæti deildarinnar.

Reading þarf að fara vinna einhverja leiki ætli liðið ekki að sogast nær fallbaráttunni, en liðið er nú í átjánda sæti, fjórum stigum frá fallsæti.