Mourinho: Þægilegur leikur fyrir okkur

Jose Mourinho var mun ánægðari með frammistöðu sinna manna í Manchester United eftir sigurinn á Bournemouth í kvöld heldur en tapið gegn WBA um helgina þar sem hann gagnrýndi leikmenn sína harðlega.

Mourinho sagði marga menn eiga það á hættu að verða teknir úr byrjunarliðinu í undanúrslitunum í bikarkeppninni gegn Tottenham um næstu helgi miðað við spilamennskuna á sunnudaginn síðasta. Hann gerði sjö breytingar á liði sínu fyrir leikinn í kvöld.

En var frammistaðan betri í kvöld? „Engin spurning. Boltinn flaut á milli manna og leikmennirnir hlupu í sóknarsinnaðar stöður,“ sagði Mourinho eftir leikinn.

„Frammistaðan byggðist á góðu hugarfari, atvinnumensku og sigurvilja.“

„Þetta var nokkuð þægilegt fyrir okkur því leikmennirnir spiluðu saman sem heild.“

Mourinho sagði eftir leikinn á sunnudag að það væru möguleikar á að krækja í byrjunarliðssæti gegn Tottenham í þessum leik í kvöld. Nýttu einhverjir sér það?

„Ég mun ekki stilla fram þessu byrjunarliði. Ég mun spila Antonio Valencia, Nemanja Matic og Romelu Lukaku. Þessir 11 leikmenn sem spiluðu í kvöld sögðu mér að þeir vildu spila og þeir eru tilbúnir,“ sagði Jose Mourinho.