Pogba og Sánchez sagðir tveir af þeim sem Mourinho ætlar að refsa

Eins og kom fram í gærkvöldi ætlar José Mourinho að refsa nokkrum leikmönnum liðsins með bekkjarsetu í undanúrslitum bikarsins um helgina á móti Tottenham fyrir frammistöðu þeirra á móti West Bromwich Albion á sunnudaginn.

WBA er langneðst í deildinni og á hraðri leið niður í B-deildina en United tókst að tapa á móti því á heimavelli, 1-0. Þau úrslit og frammistaða nokkurra leikmanna gerði lítið til að kæta Portúgalann.

Hann sagði hreint út að ákveðnir leikmenn ættu ekki skilið sæti í byrjunarliðinu í undanúrslitum bikarsins en aðspurður hvort Paul Pogba væri einn af þeim svaraði hann engu.

Enska blaðið Daiy Telegraph heldur því fram í morgun að Pogba sé einn af þeim sem verður refsað með bekkjarsetu á Wembley á móti Tottenham og við hlið hans á bekknum verði Sílemaðurinn Alexis Sánchez.

Bikarinn er síðasti möguleiki Manchester United á titli en liðið tapaði fyrir Bristol City í undanúrslitum deildabikarsins, féll úr leik gegn Sevilla í 16 liða úrslitum Meistaradeildarinnar og þá er Manchester City orðið Englandsmeistari.