Íslendingur fékk „óskarsverðlaun“ flugsins

Einkaþota með fallhlíf sem hönnuð var undir stjórn íslensks flugverkfræðings hlaut á dögunum hin virtu Collier verðlaun vestanhafs. Fallhlífatæknin hefur þegar bjargað fjölmörgum mannslífum, en hönnuðurinn segir viðurkenninguna eins konar óskarsverðlaun á sviði flugs.

Verðlaunin eru veitt ár hvert þeim sem teljast hafa unnið hvað stærstu afrekin í loft- eða geimferðum í Bandaríkjunum. Verðlaunaverkefnið 2017 er framúrstefnuleg einkaþota hönnuð undir stjórn Íslendingsins Snorra Guðmundssonar. Aðeins þarf einn flugmann í vélina sem er umtalsvert ódýrari en gengur og gerist. Hún hefur þó einnig aðra og óvenjulegri eiginleika.

„Hún er með fallhlíf um borð sem getur borið þotuna í heilu lagi til jarðar,“ segir Snorri.

Tæknin er þar í fyrsta sinn notuð í þotu af þessari stærð, en Snorri hefur áður unnið að hönnun minni vélar sem einnig voru búnar fallhlíf. Snorri kveðst auðvitað vona að aldrei þurfi að nota fallhlífarnar í nýju þotunum, en tæknin hefur þó þegar bjargað tugum mannslífa í þeim minni.

„Ég man þegar þetta gerðist í fyrsta skipti. Það var svo mikill léttir og gleði að flugmaðurinn skyldi hafa bjargast og útbúnaðurinn hafi komið út nákvæmlega eins og hann var hannaður,“ segir Snorri.

Hann segir verðlaunin gríðarlega mikla viðurkenningu, en meðal fyrri verðlaunahafa eru Orville Wright og áhöfn fyrstu geimferjunnar sem lenti á tunglinu. Snorri hefur verið heillaður af flugi alla tíð.

„Þegar ég var táningur hjólaði ég iðulega niður á flugvöll úr smáíbúðahverfinu, á hverjum degi, hvort sem rigndi eða ekki,“ segir Snorri.

Hann segir ekki hafa verið aftur snúið, og ákvað að í framtíðinni skyldi hann búa til flugvélar. Hann hélt því í nám í flugverkfræði í Bandaríkjunum þar sem hann hefur búið síðan.

„Það var ekki auðvelt fyrir mig að rífa mig upp frá fjölskyldunni og öllu sem ég var vanur. Ég gerði mér samt grein fyrir því að ef maður gerir það ekki þá kemur draumurinn aldrei til með að rætast,“ segir Snorri að lokum.