Montella rekinn frá Sevilla | Hafa ekki unnið síðan á Old Trafford

Vincenzo Montella hefur verið rekinn úr starfi sem knattspyrnustjóri Sevilla. Joaquin Caparros mun stýra liðinu út leiktíðina. Er þetta í annað skiptið á tímabilinu sem Sevilla skiptir um stjóra því Montella tók við stjórnartaumunum í lok desember.

Sevilla hefur ekki unnið leik síðan 13.mars síðastliðinn en þá kom spænska liðið mörgum á óvart og sló Manchester United út úr Meistaradeildinni í 16-liða úrslitum með 1-2 sigri á Old Trafford.

Síðan þá hefur hvorki gengið né rekið hjá liðinu og er liðið í hættu að missa af Evrópusæti en Sevilla er í 7.sæti La Liga með jafnmörg stig og Getafe sem er í 8.sæti.