Baráttan um Meistaradeildarsæti í algleymingi í lokaumferðinni | Myndband

Lokaumferð ensku úrvalsdeildarinnar fer fram í dag. Allir 10 leikirnir hefjast klukkan 14:00.

Ljóst er hvaða lið verður meistari (Chelsea) og hvaða lið falla (Hull City, Middlesbrough, Sunderland). Eina spennan er hvaða lið komast í Meistaradeild Evrópu.

Chelsea og Tottenham eru þegar örugg með sæti í Meistaradeildinni á næsta tímabili. Og það þarf mikið að ganga á til að Manchester City fylgi þeim ekki þangað.

City mætir Watford á útivelli og með sigri eru lærisveinar Peps Guardiola öruggir með að enda í 3. sætinu sem gefur þátttökurétt í riðlakeppni Meistaradeildarinnar.

Mistakist City að vinna Watford gæti liðið misst 3. sætið til Liverpool sem mætir Middlesbrough á Anfield.

Liverpool situr í 4. sætinu og er öruggt með það svo lengi sem liðið nær jafn góðum úrslitum og Arsenal sem mætir Everton á Emirates. Skytturnar verða að vinna og treysta á að Boro taki stig af Liverpool til að komast í Meistaradeildina.

Svo gæti farið að leikurinn gegn Everton verði síðasti leikur Arsenal undir stjórn Arsene Wenger sem er ekki enn búinn að skrifa undir nýjan samning við félagið.

Chelsea tekur við Englandsmeistarabikarnum eftir leik við botnlið Sunderland á Stamford Bridge.

Tottenham, sem er í 2. sæti deildarinnar, sækir Hull City heim. Flestra augu verða væntanlega á Harry Kane sem er með tveggja marka forystu á Romelu Lukaku hjá Everton í baráttunni um gullskóinn.

José Mourinho, knattspyrnustjóri Manchester United, ætlar að stilla upp krakkaliði gegn Crystal Palace á Old Tafford. Á miðvikudaginn mætir United Ajax í úrslitaleik Evrópudeildarinnar í Stokkhólmi.

Gylfi Þór Sigurðsson og félagar í Swansea City fá West Brom í heimsókn. Félagi Gylfa í íslenska landsliðinu, Jóhann Berg Guðmundsson, fær svo vonandi tækifæri í byrjunarliði Burnley sem fær West Ham í heimsókn.

Þá mætast Leicester City og Bournemouth á King Power vellinum og Stoke City sækir Southampton heim.

Leikir dagsins (hefjast allir klukkan 14:00):

Liverpool - Middlesbrough (beint á Stöð 2 Sport HD)

Arsenal - Everton (Sport 2 HD)

Chelsea - Sunderland (Sport 3 HD)

Watford - Man City (Sport 4 HD)

Man Utd - Crystal Palace (Sport 5)

Swansea - West Brom (Sport 6)

Hull - Tottenham (Stöð 3)

Burnley - West Ham (frumsýning kl. 16:15 á Sport 3 HD)

Leicester - Bournemouth (frumsýning kl. 18:05 á Sport HD)

Southampton - Stoke (frumsýning kl. 21:15 á Sport 3 HD)