Ísraelar hafa áhyggjur af vopnasölu til Sáda

Ráðamenn í Ísrael segja vopnasölu Bandaríkjanna til Sádi-Arabíu vera áhyggjuefni. Mikilvægt sé að Ísrael haldi hernaðarlegum yfirburði sínum á svæðinu. Tveir ráðherrar úr Likud-flokki Benjamin Netanyahu, forsætisráðherra Ísrael, segja að krefja verði Donald Trump, forseta Bandaríkjanna, svara þegar hann heimsækir Ísrael á næstu dögum.

Trump fagnaði í gær fjölda samninga sem Bandaríkin og Sádi-Arabía hafa gert sín á milli. Þar á meðal er samningur sem Hvíta húsið segir vera stærsta vopnasölusamning í sögu Bandaríkjanna.

Samkvæmt Times of Israel kvartaði orkumálaráðherra Ísrael, Yuval Steinitz, yfir því í dag að yfirvöld í Bandaríkjunum hafi ekki ráðfært sig við Ísrael áður en samið var um vopnasölurnar.

„Sádi-Arabía er óvinveitt ríki og við þurfum að tryggja hernaðarlega yfirburði okkar,“ sagði Steinitz.

Yisrael Katz, ráðherra njósnamála, sló á svipaða strengi en sagðist þó vona að ferðalag Trump um svæðið myndi styrkja bandalög Mið-Austurlanda gegn Ísrael. Rex Tillerson, utanríkisráðherra Bandaríkjanna, sagði í gær að tilgangur vopnakaupa Sáda væri svo þeir gætu betur varist Íran og áhrifum þeirra.

Meðal þess sem Bandaríkin ætla að selja Sádum eru Patriot og THAAD eldflaugavarnarkerfi.