Reykjavíkurborg vill rukka þá sem aka á nöglum

Fyrir liggur tillaga frá umhverfis- og samgönguráði Reykjavíkurborgar sem gengur út á sérstaka að gjaldtöku á þá ökumenn sem vilja aka um á nagladekkjum.

Tillagan snýr að því að 60. grein umferðarlaga verði breytt og við bætist grein 60.gr.a, sem orðast svo:

„Gjaldtaka af hjólbörðum með nöglum

Sveitarstjórn er heimilt að ákveða gjald af notkun hjólbarða með nöglum á nánar tilteknum svæðum. Sveitarstjórn skal ákveða gjaldtöku að höfðu samráði við umhverfisráðuneytið. Með gjaldtöku er átt við gjald sem eigandi eða ökumaður ökutækis skal greiða fyrir heimild til að aka á hjólbörðum með nöglum þann tíma sem notkun þeirra er leyfð.“

Fundur stendur yfir um þetta atriði hjá ráðinu en fulltrúar Sjálfstæðisflokksins hafa lagt fram breytingartillögu. Þar kemur fram að ekki megi gera lítið úr mikilvægi fræðsluátaks í því skyni að takmarka notkun nagladekkja. Og að notkun nagladekkja teljist afar neikvæð fyrir umhverfið, heilsu og lífsskilyrði og allar tilraunir til að minnka notkun þeirra eru mikilvægar. En notkun nagladekkja hefur tengst umferðaröryggi frekar í hugum margra en umhverfismálum. Slíka viðhorfsbreytingu þarf því að undirbúa í miklu samráði við íbúa.

„Eins þarf að skoða hvort íbúar geti treyst á mokstur og vetrarþjónustu í sveitarfélaginu og að hvaða marki. Því telja fulltrúar Sjálfstæðisflokksins að við fyrirliggjandi tillögu þurfi að bæta við ákvæði um að heimild um gjaldtöku verði aldrei samþykkt nema að helmingur íbúa hafi samþykkt það í undangenginni íbúakosningu. Slík kosning geti að sjálfsögðu verið rafræn. Íbúakosning af því tagi myndi einnig leiða af sér gríðarlega sterkt kynningarátak um skaðsemi nagladekkja og skilað miklum árangri.“