Rouhani segir Írana hafa hafnað öfgahyggju

Íranskir kjósendur höfnuðu öfgahyggju og vilja efla tengslin við umheiminn, að sögn Hassans Rouhani sem var endurkjörinn forseti Írans. Stjórnmálafræðingar segja að afgerandi sigur Rouhani gefi honum sterkt umboð til að ráðast í umbætur og koma hnignandi efnahag landsins aftur í gang.

Rouhani telst vera umbótasinnaður í hinu íhaldssama íslamska ríki Íran og hefur setið á forsetastóli frá árinu 2013. Hann hlaut 57% atkvæða í forsetakosningunum sem fóru fram í landinu í gær samkvæmt frétt breska ríkisútvarpsins BBC.

„Íranska þjóðin hefur kosið leið samskipta við heiminn, leið sem er fjarri öfgahyggju og ofbeldi,“ sagði Rouhani í sigurræðu sinni.

Ayatollah Ali Khamenei, æðstiklerkur Írans, sagði kosningarnar sýna „áframhaldandi framþróun“ írönsku þjóðarinnar í færslu á Twitter.